Namisa di munți aumbrigrei

Pisti Valamare scoasi capu soaru luñinosu. Razurili a lui s-vărsară hima tru Curdihoară și s-păscăniră Ănhau. Dapoia diunoară asărară pisti Comianulu și s-dăspărțară dindi tru Ascăpitată. Nihiam căt nihiam ma s-tuchiea neaua di pi chipturi, luḑ, plăiuri, pădz, aripi dăsvăscuti și iuțido iu area timsă ea. Di cum s-videa ațeali ira semnji țină spunea că ma intra mușata privarea. După dau-trei dzăli albăoasea a neauljei s-strapăsi pit fățăli dit dzeanj, ți nu s-bitea dit arazăli a sorului. Apa limpidă a neauljei, ți vumea fără dănăsiri, s-tuchea și s-vărsa tru trăpuri și cama hiama s-aduna stogu, umflatănda mplini treili văli, ți u mpãrța pi trei măhăli ațea hoară mușată, namisa di munț.  Anarga-anarga ma s-adra natura ntreagă. Tserulu lu-lo limpida a lui vrutsuoasă. Lucinjălji dădea ngăldzămi pi tutu locu. Ngăldzăra a lui, ți s-arăspăndea di-tu părminara a avriljiloru caldzi, tsi li striga yiljãli s-fățea azări ta s-diștăptea di lungu somnu. Așiț area disfaptă calea s-bubuchisea și s-dișcljidea filidzilji nali a iarbiljei, a liliciloru agri shi a tutilui alanti sămnari di a mănjiloru alu atslor bănători ahănt lucurtori. Nu tricu multu chirou și s-umplură meajdili, agrilji, livădz mplini cu soi di soi di lilici cu aromi noastimi, cu un zbor iuțido s-fățea bană. Di pi tuti părțili videarea mușeatoasă a primvariljei ț- lu ngăldzea inimă, suflitulu. Gianulu nu ț-s-făntea cu mușteațili, vrearili și cu njiljioasili aromi, ți li sălghea lilicili. Namisa dit munț, amvărtită di dzenj shi di necălcati păduri di chinj, faḑ, area ngărvăsitã Greva, hoară di nai cama avdzătă di-tu ginta armănească tu Arbinișii. Tuts bănătorlji a ljei, cum ațelj ți avea armasă la hoară ti scuteari iarnea shi ațelj ți area dusă hima tu arniu, ti yirnarea a turimilii di oi, ma sh-ti hiljii, ți avea inșit partizănj ti libertatea a patril’ei a noastă Arbiniși, u știea ghini că aistu chirou va s-dățea ti năș lucru și bană. Neaua area tuchit și ḑuuă di dzuuă s-tridzea pit părțili aumbăroasi a munțloru analț, di iu acãța priimnara fără dănăseari treili văli, ți lji u mpărța pri trei ațea hoară, di cama vlecljia și di cama cănăscuta di-tu grailjiu armănescu.

-roman –

Autoru: Ligor Thano